Најпрвин да ја повториме тезата која ја застапуваме: користењето на мултимедијалните системи (со функции кои се командуваат преку екрани на допир) е опасно дејствие кое сериозно ја загризува безбедноста (прочитајте повеќе тука). Потврдата на оваа теза доаѓа од британската агенција за безбедност на патиштата IAM RoadSmart која е формирана во 1956 година, а на Островот ужива висок углед и репутација.
Од спроведената обемна студија ќе се задржиме само на неколку факти: ако при возење го користиме екранот на допир, се случуваат интервали подолги и од 15 секунди кога воопшто не гледаме на патот. Колку за споредба, во случај на алкохолизираност на возачот од 0,8 промили (толку е дозволената граница во Велика Британија) реакцијата на возачот е за 12% поспора. Консумирањето на канабисот ја успорува реакцијата за 21%, пишувањето пораки за 35%, додека разговорот преку мобилен за 46%. И сега внимавајте: користењето на мултимедијалниот систем го зголемува времето на реакција за 53 до 57%!
Што значат овие бројки за безбедноста на сообраќајот е излишно да се коментира. За да состојбата биде уште поалармантна, сурфањето при возење не е забрането со закон во ниту една земја. И сето тоа во време кога веќе и не постои нов модел на автомобил со централен гребен на чија средина не се кочопери екран чувствителен на допир со безброј конективни можности и функции.
За да се стави крај на оваа крајно опасна појава не е доволно само да се воведат санкции - настрана што откривањето на користење на мултимедијалните системи е мошне тешко изводливо - туку потребно е широка акција за едукација на возачите. И укажување на последиците, секако! Свој придонес би можеле да дадат и осигурителните компании кои ако со експертиза при сообраќајни незгоди откријат користење на уредите, можат едноставно да ги поништат сите бонуси.
линкови
објавено во